Siglir tar il cuntegn

Header

Navigaziun

cuntegn

Exteriur Per dapli glisch en la rait – #ParisCall

Dapli segirtad en la rait, quai vulan 50 stadis e dapli che 150 interpresas e perquai han els suttascrit a Paris in appel communabel. Il uschenumnà «Paris Call» saja vegnì lantschà da la Frantscha en occasiun dad in inscunter internaziunal per l'avegnir digital, scriva la Frantscha en la rait.

macron en il discurs.
Legenda: Per dapli segirezza e fiduzia en la rait: Emmanuel Macron tar ses appel a Paris. Keystone

En il rom da l'inscunter internaziunal Internet Governance Forum 2018 ha il president franzos Emmanuel Macron drizzà in appel a la publicitad. Cun il #ParisCall vul el cuntanscher dapli fiduzia e segirezza en la rait, en il cyberspace. Cun il cyberspace creschian er smanatschas novas, che possian metter en privel tant las datas persunalas sco er infrastructura d'impurtanza vitala.

L'avis da la diplomazia franzosa via twitter:

Per pudair garantir ils dretgs persunals en il mund virtual stoppian ils stadis agir ensemen cun la societad civila, ha ditg Macron. L' appel è vegnì suttascrit entant da passa 50 stadis e dapli che 150 interpresas. Part da quest appel èn tranter autras mesiras per evitar che elecziuns possian vegnir disturbadas u influenzadas.

Gea svizzer – Na american, russ, chinais etc. etc.

Per la Svizra era la cussegliera federala Doris Leuthard da la partida. Ella è s’exprimida en favur d’ina collavuraziun digitala globala che sa focusescha sin ils basegns dals umans, hai num en ina communicaziun dal departament federal per ambient, traffic, energia e communicaziun.

Interessant è dentant er, tgi che n'ha betg suttascrit l'appel per dapli fiduzia e segirezza en la rait: Quai èn tranter auters ils Stadis Unids, la Russia, la China, l’Australia, l’Arabia Saudita, l’Iran u l’Israel.

RR novitads 08:00