Evlas da mar, giruns da mieurs ed auters utschels piglian si quest metal grev tissientà sch'els mangian animals ch'èn vegnids blessads u mazzads entras tala muniziun. La tissientada entras quests metals haja chaschunà che radund 55'000 utschels creschids da radund 10 sorts utschels da rapina sajan svanids da l'Europa, rapportan scienziads en il schurnal dal fatg «Science of the Total Environment».
Muniziun da plum è in grond privel per l'entir mund dals utschels. En l'Uniun europeica èn tenor stimaziuns da l'Agentura europeica per chemicalias radund 135 milliuns utschals periclitads entras il plum. U perquai ch'els traguttan directamain la muniziun, u entras quai ch'els mangian animals che han gì plum en lur corp.
Ina tala tissientada po manar tar ina dosa auta ad ina mort plauna e dolurusa. Fertant ch'ina dosa pli pitschna po chaschunar midadas fisiologicas u dal sa cuntegnair dals utschels.
Alternativas betg tissientadas
Biologas e biologs da l'Universitad da Cambridge e da l'Institut per perscrutaziun d'animals a Berlin, han calculà quant grondas che las consequenzas èn per ils utschels da rapina. Uschia è la populaziun da las evlas da mar per 14% pli pitschna che quai ch'ella fiss, sche lur funtaunas da nutriment na fissan betg stadas contaminadas cun plum.
La populaziun da l'evla da la pizza e tschess cularins è per mintgamai 13 u 12% pli pitschna – fertant che la populaziun dals sprers è 6% pli pitschna e quella dal milan cotschen 3% pli pitschna.
Ils biologs e las biologas pledeschan perquai per in scumond da muniziun da plum. Il patir e la mort da blers utschels da rapina pervi da quella muniziun saja raschun avunda a pretender da duvrar alternativas betg tissientadas.
