Siglir tar il cuntegn
Inhalt

Exteriur Pervi dad «Obamacare»: Trump smanatscha als republicans

Il president dals Stadis Unids Donald Trump sto acceptar in cuntraculp en connex cun sia emprima gronda fatschenta dapi ch'el ha surpiglià l'uffizi. Il congress ha spustà la votaziun da la refurma da sanadada da l'anteriur president Barack Obama.

purtret dal president american Donald Trump
Legenda: Sco i para ha il president Donald Trump anc betg ina maioritad per ses sboz da lescha. Keystone
  • Donald Trump ha smanatschà a sia atgna partida ch'Obamacare restia vinavant en vigur, sche sia atgna refurma da sanadad na vegnia betg sustegnida.
  • La votaziun davart la midada è vegnida spustada l'ultima minuta, perqua che plirs republicans han refusà d'approvar la refurma da sanadad da Trump. La votaziun duai esser il venderdi.

Ils senaturs èn vegnids infurmads d'in cussegliader che la chombra da represchentants na voteschia il mument betg davart Obamacare. L'emettur CNN ha rapportà che la votaziun saja pir il venderdi.

Il president Donald Trump ha silsuenter smanatschà a sia atgna partida. Sustegnian ils republicans en la chombra dals represchentants betg ses plans, sche restia tar Obamacare.

Empermischun electorala da Trump

Da dismetter la refurma da sanadad da ses antecessur en uffizi è ina da la empermischuns electoralas centralas dal president Donald Trump. El vul remplazzar ella cun in model che s'orienteschia pli fitg a l'economia dal martgà.

I sa tracta da ses emprim grond sboz da lescha. Quel vegn però er crititgà da sia atgna partida. Atgnamain avessan ils republicans la maioritad en omaduas chombras.

RR novitads 23:00+