In dals attentaders identifitgads saja purtader d'in pass sirian e saja vegnì controllà l'october en Grezia, annunzia il procuratur public da Paris. Il segund um identifitgà è in Franzos da 28 onns che la polizia tschertgava dapi 3 onns.
Cunquai èn uss identifitgads 5 dals 7 attentaders morts il venderdi. Sco quai ch’il minister da l’intern franzos Bernard Cazeneuve ha ditg, ha la polizia franzosa fatg razzias en 168 abitaziuns en l'entira Frantscha, 23 persunas sajan vegnidas arrestadas.
Puspè razzias a Molenbeek
En il quartier Molenbeek a Brüssel han las razzias da la polizia gì nagin success. Ils resultads sajan negativs, ha ditg la procuratura publica beltga. L’acziun saja stada en connex cun in dals suspectads principals. L’um da 26 onns saja anc sin la fugia.
Razzias en 168 chasas ed abitaziuns
Il minister da l’intern franzos Bernard Cazeneuve è s’exprimì davart las acziuns da polizia en l’entir pajais durant la notg. La polizia haja intercurì 168 chasas ed abitaziuns. 23 persunas sajan vegnidas arrestadas. Ins haja chattà armas. 104 persunas sajan vegnidas messas sut arrest da chasa.
Il president ed il primminister han gia ditg: Nus manain ina guerra cunter ils terrorists en l’interiur ed en l'exteriur. Ils terrorists na vegnan mai a destruir la republica, perquai ch’i vegn ad esser la republica che vegn a destruir ils terrorists.
Agir pli resolut cunter imams radicals
Uss vul la regenza franzosa agir pli resolut cunter imams radicals. La regenza duaja sa cussegliar da serrar moscheas, nua che imams derasian odi, ha annunzià il minister da l'intern Bernard Cazeneuve en la televisiun franzosa. Il stadi d'urgenza proclamà dal president François Hollande lubiss quai.
Sco ch'i para vul Hollande prolungar quest stadi d'urgenza per 3 mais, rapporta la gasetta «Le Figaro». Quai pretenda dentant il consentiment dal parlament.
FATGS:
- 5 dals 7 attentaders èn identifitgads
- La Gronda Britannia augmenta la forza da ses servetschs secrets
- Frantscha bumbardescha miras dal SI
- Tschertga d’in frar d’in dals attentaders
- Trais dals attentaders mazzads eran Franzos
- Dus dals attentaders duain avair vivì a Brüssel
- Ils attentaders han agì en 3 teams
- Il dumber da las unfrendas è creschì sin 132
- Cusseglier federal Ueli Maurer avertescha da privel da terror pli grond er en Svizra
