Siglir tar il cuntegn

Header

cuntegn

Pli divers ch'auters onns Roadmovie «Nomadland» undrà cun trais Oscars

Il film raquinta d'ina dunna che pachetescha pervi da problems finanzials, tut quai ch'ella ha en in auto e viagescha tras ils Stadis Unids.

purtret da las duas dunnas cun in grondissim surrir en fatscha.
Legenda: Frances McDormand l'actura principala da «Nomadland» e Chloé Zhao, la reschissura dal meglier film da quest onn. Keystone

Meglier film, meglra reschia e meglra actura principala. Il film «Nomadland», da la reschissura chinaisa Chloé Zhao ha rumì trais dals premis desiderads. Il film raquinta d'ina dunna (giugada da Frances McDormand), che pachetescha pervi da problems finanzials, tut quai ch'ella posseda en in auto e daventa nomada. Per l'actura èsi gia il terz Oscar da sia carriera.

Cun la reschissura Chloé Zhao è – pir per la segunda giada en l’istorgia da 93 onns dals Oscars – vegnida undrada ina dunna sco meglra reschissura. Zhao è ultra da quai l'emprima dunna betg alva ch'è vegnida undrada cun il premi.

audio
Roadmovie «Nomadland» undrà cun trais Oscars
03:27 min, RTR Audio dals 26.04.2021.
laschar ir. Durada: 03:27 minutas.

Anthony Hopkins meglier actur

Per sia rolla en il film «The Father» ha Anthony Hopkins survegnì il premi sco meglier actur. En il film gioga el in um cun demenza. L'um dad 83 onns n'ha dentant betg pudì prender encunter persunalmain ses segund premi.

purtret da hopkins.
Legenda: Anthony Hopkins en sia rolla en il film «The Father». Keystone

Actur ed actura secundara

Yuh-Jung Youn ha survegnì l'Oscar sco meglra actura secundara. L'actura da la Corea dal Sid, che ha 73 onns, è vegnida undrada per sia prestaziun en il film «Minari – Wo wir Wurzeln schlagen». Là gioga ella la tatta d'ina famiglia sidcoreana che viva en ils Stadis Unids.

purtret da la dunna asiata.
Legenda: Yuh-Jung Youn è daventada la meglra actura secundara. Keystone

En la medema categoria dals umens, ha il Brit Daniel Kaluuya gudagnà il premi. L'um da 32 onns ha survegnì il premi per sia rolla en il film «Judas and the Black Messiah». En il film nua ch'i va per la Black Panther Party en ils onns 1960 il defensur dals dretgs civils ed activist Fred Hampton. Quest film ha er survegnì il premi per la meglra chanzun: «Fight For You» da H.E.R., Dernest Emile II e Tiara Thomas.

purtret da Daniel Kaluuya.
Legenda: Daniel Kaluuya è vegnì meglier actur secundar. Keystone

Pli divers ch'auters onns

Cun ils victurs sura èsi da vesair ch'ils Oscars èn daventads quest onn pli divers. Cun ulteriurs premis èn er films davart betg alvs vegnids undrads. Sergio Lopez-Rivera, Mia Neal e Jamika Wilson per exempel, han gudagnà en la sparta Make-up/Frisuras per il drama musical «Ma Rainey's Black Bottom» davart la chantadura da pel stgira, Ma Rainey.

purtret dals trais en ina retscha vid preschentar lur Oscars.
Legenda: Sergio Lopez-Rivera, Mia Neal e Jamika Wilson. Keystone

Tut las categorias en survista

Meglier film:
«Nomadland» da Choé Zhao
Reschia:
Chloé Zhao per «Nomadland»
Actura principala:Frances McDormand
Actur principal:
Anthony Hopkins per «The Father»
Actura secundara:
Yuh-Jung Youn per «Minari»
Actur secundar:
Daniel Kaluuya en «Judas and the Black Messiah»
Film internaziunal:
«Der Rausch» da Thomas Vinterberg
Camera:
Erik Messerschmidt per «Mank»
Scenari original
Emerald Fennell per «Promising Young Woman»
Scenari adattà
Chirstopher Hampton e Florian Zeller per «The Father»
Tagl:Mikkel E.G. Nielsen per «Sound of Metal»
Musica da film:
Trent Reznor, Atticus Ross e Jon Batiste per «Soul»
Chanzun da film:
H.E.R. (Gabriella Wilson, Dernst Emile II, Tiara Thomas) per «Fight For You» (Judas and tge Black Messiah)
Design da producziun
Donald Graham Burt e Jan Pascale per «Mank»
Tun:
Nicolas Becker, Jaime Baksht, Michelle Couttolenc, Carlos Cortés e Phillip bladh per «Sound of Metal»
Effects visuals:
Andrew Jackson, David Lee, Andrew Lockley e Scott Fisher per «Tenet»
Film d'animaziun
«Soul» da Pete Docter e Dana Murray
Film d'animaziun curt:
«If Anything Happens I Love You» da Wil McCormack e Michael Govier
Documentaziun:
«My Octopus Teacher» da Pippa Ehrlich, James Reed e Craig foster
Documentaziun curta:
«Colette» da Anthony Giacchino ed Alice Doyard
Make-up/Frisuras:Sergio Lopez-Rivera, Mia Neal e Jamika Wilson per «Ma Rainey's Black Bottom»
Design da costums:
Ann Roth per «Ma Rainey's Black Bottom»
Film curt:
«Two Distant Strangers» da Travon Free e Martin Desmond Roe

RTR novitads 06:00

Artitgels legids il pli savens

Scrollar a sanestra Scrollar a dretga