Plirs millis da fugitivs turnan en lur patria

Grazia ad agid internaziunal viageschan millis da fugitivs da la Grezia enavos en lur patria. Dapi l'entschatta da l'onn han passa 3’200 fugitivs nizzegià in program da l'Organisaziun internaziunala per migraziun IOM per sa laschar repatriar.

Entaifer ina tenda da fugitivs en la Grezia. Bild in Lightbox öffnen.

Legenda da maletgs: Ina tenda en in champ da fugitivs sin l’insla greca da Chios. Keystone

«I sa tracta da migrants che na survegnan betg asil en la Grezia», ha ditg ina pledadra da l'organisaziun. Per gronda part sajan els gia turnads en lur pajais d'origin, il Maroc, il Pakistan, l’Afganistan, il Bangladesch ed auters pajais asiatics e da l'Africa dal Nord.

La IOM porscha als fugitivs in return segir. Latiers survegnan els in pitschen sustegn finanzial da 500 euros, sco emprim agid per la nov'entschatta en lur patria.

Las davosas emnas han plirs tozzels fugitivs empruvà da returnar sur sasez da la Grezia enavos en la Tirchia. I saja da supponer che cuntrabandists hajan empermess da transportar els vinavant en l’Europa centrala, ha ditg in uffizier da la guardia da costa greca.

RR novitads 15:00