Da discurrer da "serrar" la ruta dil Balcan fiss per Jürg Martin Gabriel, professer emerità dal l' ETH, stà la fallida formulaziun. "Serrada" na fiss la ruta numnadamain betg vegnida. Pli adattà fiss tenor el da discurrer dad in corridor. Fugitivs prendian tuts, migrants dentant betg. "In fugitiv è intgin ch'è en privel da mort", explitgescha el. Quella definiziun saja fixà en la convenziun da Genevra per fugitivs.
"Migrants, na betg fugitivs"
La gronda part dallas persunas che prendan la ruta dil Balcan na sajan tenor Gabriel betg fugitivs mabain migrants. Fertant ch'ils pajais sajan obligads da prender si fugitivs, na sajan els betg obligads da prender si ils migrants.
Sche la ruta dil Balcan vegniss serrada, avess quai per consequenza rutas alternativas. Che la ruta dal Mar Mediterrana Central - che maina da la Libia en Sicilia - pudess esser ina da quellas alternativas, na craja Gabriel betg. Il pli grond problem da la ruta dal Mar Mediterran è il mar sez.
Pajais cun caos envers pajais, che funcziunan
"Il segund problem ei politics. En la Libia èsi numnadamain chaos total" di Gabriel. En la Tirchia, pajais da partenza per la ruta dil Balcan, funcziunessia l'administraziun. En la Libia funcziuneschi dentant bunamain nagut. Las premissas per organisar in viadi surmar en Tirchia èn pia bunas. En la Libia n'è quai betg il cass.
Malgrad che la ruta dal Mar Mediterran na vala tenor Gabriel betg sco ruta alternativa pudess ella puspè vegnir pli fetg en il focus. Durant igl unviern saja quella ruta memia malsegira. Uss, cun la primavaira sa vegni quai dentant a sa midar.