L’emna passada è vegnida publitgada l’applicaziun «Pokémon Go». Gia suenter paucs dis èn milliuns giugaders a la chatscha da las creatiras virtualas cun lur telefonins.
L’app na datti dentant anc betg en Svizra. Ma i dat mussavias, cun l’agid dals quals ins po tuttina installar il gieu sin telefonins cun Android u sin l'iPhone.
Installar sin apparats cun Android
- Visitar questa pagina e cliccar sin «Download APK»
- Ir en las opziuns dal telefonin tar il punct «segirezza»
- Activar l’opziun «derivanza nunenconuschenta»
- Smatgar en l’ordinatur «Downloads» sin la data APK.
Installar sin iPhone
- Deconnectar da las opziuns da iTunes.
- Ir en l’App Store e selecziunar d’installar in’app gratuita.
- Uss pon ins far ina nov conto da Apple (Apple ID).
- Selecziunar «Australia» sco pajais. Selecziunar «nagina» sco opziun da pajament.
- Far ina nov’adressa d’e-mail; Apple trametta in mail cun in link da confirmaziun.
- Telechargiar l’app «Pokémon Go».
Fastidis pervi da segirezza da datas
L'agentura da novitads SDA rapporta ch'In expert d’informatica aveva avertì ch’il gieu veglia access a bleras datas dals telefonins, concret sin l’entir conto da Google.
Per part saja quai er stà il cas, ma per sbagl, sco il sviluppader Niantic Labs ha communitgà. Pokémon Go haja be access al num da l’utilisader ed a l’adressa d’e-mail. «Naginas autras datas dal conto da Google vegnan u èn vegnidas rimnadas», uschia Niantic Labs.
Success finanzial per Nintendo
La svelta derasaziun e la popularitad da Pokémon Go han catapultà ad aut la valita da l’aczia dal concern da gieus da computer giapunais Nintendo.
Be il mardi ha l’aczia gudagnà bunamain 13% ed ha serrà cun 22’840 Yen (radund 220 francs). Durant ils ultims quatter dis (incl. mardi) aveva la bursa a Tokio notà in plus da totalmain 59% per l'aczia da Nintendo.
RR actualitad 11:00