Investiziuns en ovras atomaras ed ovras d'energia da gas duajan ins pudair classifitgar en l'Uniun europeica (UE) sco favuraivlas al clima, sche tschertas cundiziuns èn ademplidas. Quai preveda ina proposta per in nov reglament da la cumissiun da l'UE, rapporta l'agentura da novitads Reuters. La finamira saja da dar la pussaivladad ad investurs d'investir pli persistent.
Las cundiziuns per far «verdas» investiziuns en forza atomara u da gas
Tenor il sboz duain investiziuns en ovras atomaras, per exempel, esser qualifitgadas sco «verdas» e favuraivlas al clima, sche l'ovra funcziuna tenor ils pli novs standards tecnics. Supplementarmain dvori in plan concret per gestiunar in cundriz per dismetter il rument radioaktiv il pli tard a partir dal 2050. E sco ulteriura cundiziun è previs che quai valia per ovras che survegnan la lubientscha da bajegiar enfin il pli tard il 2045.
Dispitaivla entaifer l'UE è la dumonda, tge tecnologias che valan sco «verdas». Entant che la Germania na vul betg dar quest label a la forza atomara, vul la Frantscha percunter far quai. Singuls stadis commembers ed experts duain sco proxim examinar il sboz.
Titular forza atomara e da gas sco «verd» na saja betg credibel
Suenter ch'il sboz è daventà public, cura che l'UE l'ha tramess als stadis commembers, han organisaziuns per la protecziun da l'ambient reagì immediat. I sa tractia d'in cumpromiss e concessiun en l'interess da singuls stadis commembers sco la Germania e la Frantscha, hai num. E taluisa sutmineschia l'UE sias atgnas finamiras stipuladas per la protecziun dal clima. Quai pretenda tranter autras organisaziuns l'Agid per l'ambient da la Germania.
Etichettar forza atomara sco persistenta è fallà tar questa tecnologia d'aut ristg.
Era dal parlament da l'UE datti reacziuns cleras: Cun questa proposta destrueschian ins la credibilitad dal label ecologic europeic, ha ditg il deputà Michael Bloss (Verds). Da metter forza atomara e da gas sin il medem livel sco forza solara e da vent ridiculiseschia la chaussa e muntia ina beffa siper ils success cuntanschids fin ussa.
Consultaziun enfin mez schaner
Il sboz da la cumissiun da l'UE è ussa en consultaziun tar ils stadis commembers fin ils 12 da schaner. Per eventualmain evitar ch'il reglament giaja en vigur datti duas pussaivladads. Ina è ch'i dat in'uschenumnada maioritad qualifitgada rinforzada dals stadis commembers. Quai munta ch'almain 20 stadis commembers en il Cussegl da l'UE ston sa metter ensemen encunter il reglament. L'autra pussaivladad fiss ina maioritad en il parlament da l'UE, per la quala i duvrass la vusch dad almain 353 deputadas u deputads.