En ina decleraziun communabla sustegnan Theresa May, Emmanuel Macron ed Angela Merkel cleramain la cunvegna cun l'Iran. Da mantegnair questa cunvegna saja l'interess da segirtad communabel, hai num en il document.
Il president american Donald Trump aveva annunzià venderdi in curs pli rigurus envers l’Iran. El n'ha betg visà la cunvegna nucleara cun l'Iran. El ha dentant er betg confermà che l’Iran respectia quella cunvegna ch’el ha fatg cun la cuminanza internaziunala. Il motiv saja che l’Iran accumpleschia betg il principi da basa da la cunvegna, vul dir purtar pasch e stabilitad en la regiun.
Teheran vul mantegnair cunvegna
Curt suenter il pled da Trump ha l'Iran annunzià da restar sin curs e da sa tegnair vid la cunvegna. Il congress american duai uss cussegliar co reagir sin test da rachetas dal Iran. Sch'ils parlamentaris na chattan betg ina soluziun cuntentaivla per ina nova lescha, vegnia la cunvegna desditga, ha Trump ditg.
Tenor IAEA è controlla dal program d'atom pussaivla
L'autoritad internaziunala d'energia nucleara IAEA po controllar il program d'atom da l'Iran sco ella vul. Lur glieud haja gì fin uss access a tut ils lieus ch'els vulevan visitar. Quai ha ditg il schef da l'IAEA.
L'IAEA reagescha uschia sin il pled dal president american Donald Trump davart la cunvegna d'atom cun l'Iran. Quel aveva pretendì che la cunvegna lubeschia mo ina flaivla controlla e che l'Iran na sa tegnia betg vid la cunvegna. Quai ha la IAEA dementì.
RR novitads 12:00