Exteriur - Polizia da la Malaisia ha chattà 139 fossas
La polizia da la Malaisia ha chattà al cunfin cun la Tailanda, tenor atgnas indicaziuns, 139 fossas cun fugitivs supponids. En pliras fossas haja dapli che mo ina bara, ha ditg il schef da polizia Khalid Abu Bakar.
Ultra da quai hajan ses collegas chattà 28 champs, probabel champs che cuntrabandists da persunas hajan endrizzà per transferir fugitivs da Myanmar e Bangladesch en il sid-ost da l'Asia.
Curt avant avevan medias da la Malaisia rapportà che la polizia haja chattà fossas communablas cun tschients da baras.
