Siglir tar il cuntegn
cuntegn

Exteriur Polizia egipziana mazza 40 terrorists supponids

Ils terrorists supponids sajan vegnids mazzads durant in'acziun coordinada, en trais zups da terrorists a Gizeh ed en il nord da la peninsla, ha communitgà il minister da l'intern.

Purtret dal bus destruì ils 28 da december a Cairo.
Legenda: Quest bus è vegnì destruì venderdi d'ina bumba, datiers da las piramidas da Gizeh. Keystone

Ils terrorists supponids hajan planisà ina seria d'attatgas cunter insituziuns statalas, indrizs terroristics, forzas da segirezza e baselgias, rapporta la televisiun statala cun sa referir sin il ministeri da l'intern.

Il venderdi eran mortas quatter persunas tar in'attatga terroristica sin in bus cun turists, datiers da las piramidas da Gizeh a Cairo. 12 ulteriuras persunas èn vegnidas blessadas.

Situaziun da segirezza fragila

Dapi la cupitgada dal president islamistic, Mhammed Mursi entras il militar il 2013 è la situaziun da segirezza en Egipta fragila. Adina puspè datti attatgas terroristicas. Savens èn forzas da segirezza u copts las miras. Er turists vegnan dentant attatgads. Il fanadur da l'onn passà èn duas dunnas germanas vegnidas mazzadas tar in'attatga cun in cuntè a Hurghada.

RR novitads 11:00