Siglir tar il cuntegn

Header

cuntegn

Exteriur Polizia ha arrestà l'assassin supponì da Charleston

La polizia americana ha para arrestà l'um che duai avair mazzà ier saira 9 persunas a Charleston en il stadi South Carolina.

Il giuven suspectà - in um da pel alva da 21 onns - saja vegnì arrestà en il stadi vischinant North Carolina, annunzian la polizia americana. L'um aveva sajettà ier saira sin visitaders d'ina instrucziun da bibla, ils blers da pel naira. Las autoritads supponan in act rassistic.

Mesemna, enturn las 21:00 a Charleston

En il Stadi american South Carolina, a Charleston, ha in um sajettà enturn en ina baselgia che vegn visitada surtut da persunas cun pel stgira. I haja dà almain 9 morts e plirs blessads, rapporta la polizia locala.

La mesemna saira enturn las 21:00 temp local haja in um da pel clera sajettà enturn en la «Emanuel African Methodist Episcopal Church» a Charleston. Questa baselgia vegn surtut visitada da persunas cun pel stgira.

Tar la sajettada sajan 8 persunas vegnidas mazzadas immediat. In’ulteriura persuna saja morta da las blessuras en l’ospital. Ina persuna sa chattia grevamain blessada en l’ospital, quai ha ditg il schef da la polizia da Charleston, Gregory Mullen. Mullen ha discurrì d’in «crim per odi».

Tschertga cun sustegn ord l’aria e da chauns da polizia

Gist suenter il mazzament haja la polizia cumenzà cun ina grond’acziun da persecuziun cun sustegn ord l’aria e da chauns da polizia. Mullen ha ditg ch'ins veglia far la segira che l’um na saja betg en la vischinanza e commettia ulteriurs crims. Tenor indicaziuns da la polizia locala haja l’um enturn 20 onns e saja sin la fugia.

Consentiment da politichers

Il crim è in ulteriur cas da violenza cunter persunas da pel stgira en l’America, nua che la debatta davart il rassissem è oramai fitg intensiva. La guvernatura da South Carolina, Nikki Haley, ha ditg ch’ella uria per las unfrendas da quest «fatg nunchapibel».

Il candidat republican per il presidi dals Stadis Unids, Jeb Bush, ha scrit via Twitter:

Sumegliantamain è era la candidata democrata per il presidi, Hillary Clinton, s’exprimida en las medias socialas:

RR novitads 08:30

Artitgels legids il pli savens