Siglir tar il cuntegn

Header

cuntegn

Exteriur Polizia serra center da Brüssel: la tschertga continuescha...

A Brüssel vala anc adina il stadi d'urgenza il pli aut. Las viafiers sutterranas èn serradas, militar e polizia patrulleschan a las staziuns ed a l'eroport. La populaziun è dumandada dad evitar grondas fullas da glieud.

En il center da Brüssel ha la polizia entschiet dumengia la saira cun pliras acziuns d'anti-terror. Pliras vias en il center èn serradas, rapporta l'agentura da novitads Belga. La regenza na ristgia betg da sbassar il stadi d'urgenza ord tema d'in attentat sco a Paris, manegia il primminister Charles Michel. Perquai ha la regenza era rinforzà la polizia e l'armada.

Tschertga dals attentaders suponids continuescha

Entant continuescha la tschertga da 2 attentaders supponids. Polizia ed armada tschertgan 2 persunas che duain avair organisà attatgas sumegliantas a quella a Paris avant in'emna. Il minister da defensiun discurra da «plirs suspectads». Per la regiun da la chapitala belgiaisa Brüssel vala il pli aut stgalim d’alarm per in’attatga da terror. Il stgalim proclamà munta in privel «serius e direct», scriva l’agentura da novitads belgiaisa Belga.

Polizia evacuescha chasa da medias, tschertga materials explosivs

La dumengia era la chasa da medias da la gruppa Medialaan a Vilvoorde datiers da Brüssel vegnida rumida pervi d'ina smanatscha d'in attentat da bumbas. L'entir bajetg era vegnì evacuà, tuts collavuraturs avevan stuì bandunar lur biros, rapporta l'agentura da novitads Belga. Policists cun tgauns detecturs han intercurì la chasa per eventuals materials explosivs.

La polizia n'ha dentant chattà nagins indizis per ina bumba. Entant è la chasa da medias puspè dada libra.

Indizis concrets per attatgas terroristicas

Tenor il primminister Charles Michel dettia quai indizis concrets che terrorists planiseschian in'attatga cun armas e bumbas a Brüssel. Michel precisescha ch'i haja dà ins smanatscha d'in attentader da far attatgas en «differents lieus» a Brüssel.

Las infurmaziuns sajan relativamain precisas: En mira sajan surtut vias cun butias, demonstraziuns, lieus cun bleras persunas e meds da traffic, ha ditg il primminister Charles Michel.

Ulteriura Belgia resta sin segund'aut stgalim

Per las ulteriuras regiuns en Belgia resta il privel d’acts da terror sin il segund aut stgalim, quai che munta in privel pussaivel e probabel. Suenter la seria d’attatgas a Paris avevan las retschertgas mussà colliaziuns dals attentaders cun Brüssel. Il venderdi ha la procura publica da la Belgia accusà in’ulteriura persuna suspectada.

Traffic public per part ord funcziun

Il traffic da tren sutterran per entant suspais. Durant la fin d’emna na duai la metro betg charrar, quai sin l’entira rait da lingias, communitgescha il center da crisa naziunal da la Belgia. Tenor infurmaziuns dal radio beltg RTBF duain trams e bus però restar en funcziun.

Plinavant ha il center da crisa cusseglià als burgais d’evitar grondas fullas da glieud sco tar concerts u a staziuns. Plirs eveniments gronds èn vegnids stritgads.

RR novitads 06:00+

Artitgels legids il pli savens