L’acziun da polizia saja succedida il dretg mument, ha ditg il minister da l'intern Thomas de Maizière. Avunda baud per evitar l’attatga, e tuttina uschè tard per avair mussaments. La polizia e tut las autras partiziuns involvidas hajan prestà lavur entira, ha agiuntà de Maizière.
In motiv islamistic
Forzas spezialas avevan arrestà il mardi en damaun a Schwerin in Sirian da 19 onns. La polizia suspecta l’um giuven d’avair preparà in’attatga cun material explosiv ord motivs islamistics. A Schwerin ed a Hamburg ha la polizia perquirì abitaziuns. Las investigaziuns ha la Procura publica federala tudestga surpiglià.
RR novitads 14:00