La refurma da la giustia en la Pologna na saja betg ina refurma, mabain ina devastaziun. Per la cumissiun da l'Uniun europeica stat il stadi da dretg en la Pologna al spartavias. I na sa tractia betg da singulas intervenziuns intenziunadas cunter nursas nairas, mabain d'in bumbardament da surfatscha.
L'uschenumnada refurma en Pologna è uss arrivada tar in mument privlus perquai ch'ella pudess daventar irreversibla.
Il nov sistem giudizial en la Pologna avria pussaivladads per disciplinar derschaders e pericliteschia uschia lur independenza.
Fin a la relaschada
La regenza conservativa a Warschau è dapi onns vid structurar enturn il sistem giudizial dal pajais. Mardi ha il president, Andrzej Duda suttascrit ina lescha che pussibilitescha da disciplinar derschaders, quai malgrà critica internaziunala. La lescha prevesa che derschaders pon vegnir chastiads cun chastis da daners, cun vegnir degradà u cun vegnir relaschà, sch'els mettan en dumonda la cumpetenza da decider u legalitad d'in auter derschader, d'ina chombra u d'ina dretgira. Plinavant na pon els betg s'engaschar a moda politica.
Relaziuns tendidas
Las relaziuns tranter la cumissiun da l'UE e Warschau èn gia daditg tendidas. Tar autras parts da la refurma da giustia han las autoritads da Brüssel gia reagì ed èn idas davant il tribunal europeic. Plinavant ha la cumissiun da l'UE instradà il 2017 in process dal stadi da dretg tenor il contract da l'UE encunter la Pologna.
Ord l'archiv da SRF
RTR novitads 09:00
