Siglir tar il cuntegn

Header

Navigaziun

cuntegn

Ponte Morandi 9 persunas arrestadas en connex cun sballunada da punt a Genua

La procura publica taliana ha arrestà las nov persunas en connex cun la sballunada da la Ponte Morandi il 2018 a Genua. Tranter ils arrestads sajan persunas dal fatg da la societad d'autostrada «Autostrade per l'Italia» e gestiunaria dal viaduct. Tar la sballunada avevan 43 persunas pers la vita.

Las persunas arrestadas duain avair sfalsifitgà documents da controlla per punts d'autostrada e quai avant e suenter la disgrazia a Genua, quai han communitgà las autoritads.

En total vegn investigà encunter passa 80 persunas. Tranter quellas era funcziunaris dal ministeri da traffic a Roma e funcziunaris da la societad da gestiun da vias ANAS. Ad els vegn renfatschà negligientscha tar las controllas.

43 morts tar sballunada

Tar la disgrazia, mez avust 2018 era la Ponte Morandi sballunada sin ina lunghezza da passa 100 meters. Anc betg cler è sch'i ha dà avertiments davart il stadi desolat da la punt e sch'ins n'ha betg piglià serius quels ed uschia manchentà da far lavurs da mantegniment. 43 persunas han pers lur vita cura che la punt è sballunada. Il mument vegn la punt amez Genua puspè reconstruida. Fin la primavaira 2020 duai la punt puspè esser si, suenter in plan dal stararchitect Renzo Piano.

Ord l'archiv da SRF:

Legenda: Guardar il video In onn suenter la sballunada da la Ponte Morandi. Durada 01:18 minutas.
Or da SRF News dals 14.08.2019.

RR novitads 15:00