Discriminaziun, apartheid u autras malgistadads: Tutu ha adina chattà clers pleds. Sco anglican è l'um daventà la vusch dal cumbat cunter l'apartheid en l'Africa dal Sid. Il 1984 è el vegnì undrà per ses cumbat nunviolent cun il Premi Nobel da la pasch. Durant onns è Tutu stà, sco in dals pli enconuschents spirituals, la conscienzia morala dal pajais.
Ensemen cun ses ami, Nelson Mandela, vala Tutu sco in dals fundaturs per l'Africa dal Sid moderna. Cuntrari a Mandela ha el dentant mai vulì in post en la politica. Durant l'apartheid ha el condemnà la discriminaziun e segregaziun da las razzas, suenter l'apartheid è Tutu alura stà cumbattant per la reconciliaziun tranter nairs ed alvs.
President da la cumissiun per vardad e reconciliaziun
Sin giavisch da Mandela ha Tutu surpiglià il 1996 il presidi da la cumissiun per vardad e reconciliaziun en il pajais. Quella è sa confruntada cun ils crims durant l'apartheid. Il moto da Tutu: «Perdunar, dentant betg emblidar». Milliuns han pudì observar en la televisiun, sco Tutu ha rapportà sut larmas da las unfrendas da l'apartheid.
Passa 20'000 unfrendas, lur confamigliars ed ulteriuras parditgas han prendì posiziun envers la cumissiun. A var 3500 delinquents ha la cumissiun sut Tutu predunà. Bleras unfrendas n'èn betg stadas d'accord cun quest agir, uschia èn tranter auter blers assassins vegnids perdunads.
