A l'universitad da Prag ha in student sajettà la gievgia 14 persunas, 25 ulteriuras persunas èn vegnidas blessadas, per part grevamain. Pertutgada saja la facultad filosofica, là studegian radund 8'000 studentas e students. Ils motivs da questa attatga n'èn anc betg clers – la polizia sclaudia dentant ina raschun terroristica. I sa tracta da la pli greva attatga dad in assasin en l'istoriga da la Tschechia.
L'attatgader è era mort, sch'el ha sajettà sasez u è vegnì sajettà da la polizia n'è anc betg cler. Sco las autoritads han communitgà, haja l'um da 24 onns probabel gia mazzà ses bab ed ina figlia pitschna da lez avant in'emna en l'aglomeraziun da la chapitala.
La regenza ha exclamà per questa sonda ina malencurada statala dad in di. Bandieras vegnan messas a mesa asta, las chadainas da glischs al pignol da Nadal en la citad veglia da Prag duain stizzar. Planisà è er in servetsch divin da malencurada en la catedrala da Prag.