Siglir tar il cuntegn

Header

cuntegn

Premi Nobel 2022 Premi Nobel da medischina va al scienzià svedais Svante Pääbo

Il Premi Nobel da la medischina va quest onn al scienzià svedais Svante Pääbo. Pääbo è directur e collavuratur scientific a l'Institut Max Planck per antropologia evoluziunara a Leipzig.

Undradas vegnan sias scuvertas davart l'evoluziun dal carstgaun. Quai communitgescha l'Institut Karolinska a Stockholm. Pääbo ha sequenzà sco emprim perscrutader il genom da l'uman dal Neandertal. Er ha el scuvrì sco emprim l'uman da Denisova, ina populaziun separada dal gener homo. Cun bler interess ha la publicitad reagì sin sia scuverta ch'ils umans moderns han per part gens dal Neandertal.

Sco giustificaziun per il premi di il comité che decida davart la premiaziun: «la dumonda, danunder che nus vegnin, e tge che fa nus unics, ha fatschentà ils umans da vegl ennà.» La lavur da Pääbo dettia ina basa per respunder quellas dumondas.

La distincziun la pli impurtanta per medias e medis è dotada quest onn cun 10 milliuns curunas svedaisas (var 890'000 francs svizzers). Dapi l’onn 1901 han 224 persunas survegnì il premi Nobel da medischina, tranter quellas 12 dunnas. L’emprim è ì al bacteriolog tudestg Emil Adolf von Behring per la scuverta d’ina terapia cunter la difteria.

Premi Nobel 2022

Avrir la box Serrar la box

Retschavidras e retschaviders dal Premi Nobel 2022 en las diversas categorias vegnan annunziads:

  • Glindesdi, ils 3 d'october: fisiologia u medischina
  • Mardi, ils 4 d'october: fisica
  • Mesemna, ils 5 d'october: chemia
  • Gievgia, ils 6 d'october: litteratura
  • Venderdi, ils 7 d'october: pasch
  • Glindesdi, ils 10 d'october: economia

Il Premi Nobel vegn surdà mintg'onn dapi il 1901 tradiziunalmain ils 10 da december, al di da la mort dal fundatur dal premi Alfred Nobel.

audio
RTR novitads da las 12:00
ord RTR Audio dals 03.10.2022.
laschar ir. Durada: 5 minutas 46 Secundas.

RTR novitads 12:00

Artitgels legids il pli savens