Dus scienziads dals Stadis Unids ed in da la Gronda Britannia survegnan il premi Nobel da chemia 2018. Quai communitgescha l'Academia roiala per scienzas da la Svezia a Stockholm. Frances Arnold, George Smith e Gregory Winter hajan contribuì al svilup d'ina industria chemica verda. Ils trais scienziads han sviluppà sin basa dals princips da l'evoluziun proteins per carburants biologics e medicaments. L'academia discurra en quest connex dad ina revoluziun sin basa da l'evoluziun.
Frances Arnold pir tschintgavla dunna
Tranter ils titulars dal Premi Nobel da chemia èn fin uss stadas quatter dunnas – ina d'ellas è stada Marie Curie il 1911. Curie ha scuvert ils elements radioactivs Polonium e Radium.
Il Premi Nobel da chemia è dotà cun radund 990'000 francs. El vegn surdà tradiziunalmain ils 10 da december. Dapi il 1901 è il Premi Nobel da chemia vegnì surdà a 177 differents scienziads. Il Brit Frederick Sanger ha gudagnà il premi duas giadas.
RR novitads 12:00
