Siglir tar il cuntegn

Header

cuntegn

Exteriur Premi Nobel da fisica va a trais perscrutaders

Il premi Nobel da fisica va quest onn a plirs scienziads. Arthur Askin, dals Stadis Unids, Gérard Mourou da la Frantscha e Donna Strickland dal Canada vegnan onurads per lur invenziuns en la sparta fisica da laser. Quai ha communitgà l'Academia roiala da la Svezia a Stockholm.

Per l'emprima giada dapi 55 onns va uschia il premi Nobel da fisica puspè ad ina dunna. Strickland è pir la terza dunna insumma che survegn il premi Nobel da fisica suenter la Franzosa Marie Curie (1903) e la Tudestga Maria Goeppert-Mayer (1963).

Arthur Askin survegn il premi per avair svilupà pincettas opticas e lur applicaziun en sistems biologics. Gérard Mourou e Donna Strickland vegnan onurads per lur metoda da far puls optics ultra-curts ed autamain intensivs.

L'onn passà han trais Americans survegnì il premi Nobel da fisica per avair cumprovà per l'emprima giada las undas da gravitaziun en l'univers.

Nagin premi Nobel da litteratura quest onn

Damaun mesemna vegn dà enconuschent ils onurads per il premi Nobel da chemia ed il venderdi lura il premi Nobel da la pasch. Il premi Nobel da litteratura na datti quest onn betg suenter il scandal en il gremi da la giuria. Persuenter duai la distincziun 2019 vegnir surdada a dus auturs.

RR novitads 12:00

Artitgels legids il pli savens