Siglir tar il cuntegn
Inhalt

Exteriur Premi Nobel da pasch a duas persunas

Il medi dal Congo, Denis Mukwege, e l'activista jesida da l'Irac, Nadia Murad, vegnan quest onn onurads cun il premi Nobel da la pasch. Quai a il comité da Nobel annunzià ad Oslo.

purtret da Denis Mukwege e Nadia Murad
Legenda: Denis Mukwege dal Congo e Nadia Murad da l'Irac survegnan il premi. Keystone

Omadus survegnan la distincziun per lur engaschi e lur stentas cunter la violenza cunter dunnas.

L'activista per ils dretgs umans

Nadia Murad, l'activista per ils dretgs umans da 25 onns, è stada trais mais en ils mauns da la gruppa da terror Stadi Islamic. Oz viva ella en la Germania e fa sco ambassadura speziala da l'ONU attent sin las painas da las unfrendas dal SI.

Il ginecolog

La segunda onuraziun va a Denis Mukwege, in ginecolog dal Congo che tracta dunnas violadas. El survegn il premi er per ses engaschi da terminar la violenza sexuala sco arma da guerra, uschia scriva il comité Nobel.

Passa 300 candidaturas

Il premi Nobel da la pasch, ch'è dotà cun bunamain in milliun francs, vegn surdà ils 10 da december. La giuria ha stuì decider quest onn tranter 331 candidaturas (216 persunas e 115 organisaziuns).

L'onn passà ha il comité Nobel dà il premi a la Ican, la Campagna internaziunala per il discharmament atomar, per ses cumbat per in mund senza armas atomaras.

RR novitads 11:30