Il Premi Nobel da pasch va quest onn a Narges Mohammadi, in'activista per ils dretgs da las dunnas. La dunna ch'è en praschun vegn undrada per «ses cumbat cunter l'oppressiun da las dunnas en l'Iran e per ses engaschi per ils dretgs umans e libertad per tuts.» Quai communitgescha il comité Nobel ad Oslo.
Mohammadi è stada fin tar sia arrestaziun vicedirectura dal «Defendes of Human Rights Centers», in'organisaziun nunguvernamentala. La dunna da 51 onns sesa giu actualmain plirs chastis en la praschun dad Evin a Teheran. Ils chastis muntan a totalmain 12 onns.
Narges Mohammadi cumbatta cunter la suppressiun sistematica da las dunnas.
La fin da l'onn 2022, durant las revoltas en tut il pajais cunter l'apparat da pussanza da l'Iran, ha Mohammadi revelà in rapport ch'ha scuvrì la tortura probabla da dunsainas da dunnas en la praschun d'auta segirezza.
L'Iranaisa è la 19avla dunna en l'istorgia che survegn il premi. Il premi è dotà cun 11 milliuns cronas svedaisas, radund 950'000 euros, e vegn surdà ils 10 da december ad Oslo.
