L'econom britannic Angus Deaton (1945) docescha a l'universitad da Princeton (USA) e survegn il premi per sia analisa dal consum, la paupradad ed il bainstar public, communitgescha la cumissiun da l'Academia roiala svedaisa a Stockholm.
L'Academia punctuescha 3 puncts concrets da la perscrutaziun da Deaton:
- Co ils consuments repartgan lur expensas sin ils differents bains
- Quant da las entradas da la societad che vegn dà ora, e quant spargnà
- Co i va il meglier da mesirar ed analisar il bainstar public e la paupradad
Auter che tschels premis Nobel
Il premi Nobel per las scienzias economicas è auter che tschels premis betg fixà en il testament dal fundatur Alfred Nobel. Quest premi sponsurisescha la Banca centrala svedaisa dapi il 1968. Ses num uffizial è perquai «Premi da la Banca centrala Svedaisa per las scienzias economicas en memoria dad Alfred Nobel».
El vegn surdà ensemen cun ils premis Nobel classics ils 10 da december. Dotà è il premi sco ils premis Nobel uffizials cun CHF 929'000.-.
RR novitads 14:00