Siglir tar il cuntegn

Header

cuntegn

Exteriur Presidi UE: Juncker dubitescha vi da la Rumenia

Il president da la cumissiun europeica Jean-Claude Juncker dubitescha che la Rumenia saja propi pronta da surpigliar il presidi dal Cussegl da l’UE l’entschatta da l’onn. Quai rapporta l'agentura da novitads SDA citond ord in'intervista da Juncker en la gasetta «Welt am Sonntag».

La Rumenia saja bain preparada tecnicamain, ma Jean-Claude Juncker na craja tenor l'intervista en la «Welt am Sonntag» betg che la regenza haja propi chapì tge ch’il presidi dal Cussegl da l’UE muntia:

Per pudair negoziar prudentamain vuli er la prontezza da tadlar ad auters e la ferma voluntad da metter enavos ils agens interess.
Autur: Jean-Claude Juncker president da la cumissiun europeica

Pervi da ses «stadi intern» na possia la Rumenia betg sa mussar sco unitad cumpacta en Europa. Exact quai saja dentant necessari per promover l'unitad da l'Europa, ha Juncker ditg vinavant.

Il prim da schaner surpiglia la Rumenia per l’emprim giada il presidi dal Cussegl da l’UE. L’UE renfatscha a la Rumenia da na betg far avunda cunter la corrupziun.

RR novitads 10:00+

Artitgels legids il pli savens