Siglir tar il cuntegn

Header

vista sin in plazzal da construcziun nua ch'i dat in'ovra atomara
Legenda: Er en l'energia atomara vegn investì dapli daners, sco qua en la Bielorussia ad Ostrovets. Keystone
cuntegn

Exteriur Pretsch d'ieli franescha investiziuns en l'energia

Sin l'entir mund èn las investiziuns en la branscha d'energia sa reducidas l'onn passà per 8% cumpareglià cun l'onn avant. Cunzunt tar ieli e gas èsi vegnì investì damain sco in rapport da l'Agentura internaziunala per l'energia IEA mussa. En tut èn vegnids investids 1,8 billiuns dollars.

En spezial en l'America dal nord è vegnì investì damain daners per novas metodas d'explotaziun. En ils Stadis Unids èn per exempel las investiziuns en l'explotaziun da gas da plattamorta («Schiefergas») sa reducidas ils ultims dus onns per 52%. Quai malgrà che las investiziuns en il sectur da ieli e gas muntan a 45% da tuttas investiziuns en la branscha d'energia.

Dapli daners per l'effizienza d'energia

Charvun resta la segund impurtanta funtauna d'energia. En spezial en ovras da charvun veglias ed ineffizientas vegn investì bler daners, quai resulta dal rapport. En il schlargiament d'energia atomara vegn investì tants daners sco dapi 20 onns betg pli, en spezial er pervi da las activitads en la China.

Constattà in augment da las investiziuns han ins tar l'effizienza d'energia. L'onn passà èn las investiziuns s'augmentadas per 6% sin 197 milliardas euros.

Las investiziuns en energias regenerablas èn restadas pli u main stabilas l'onn passà sin 258 milliardas euros.

RR novitads 06:00