Siglir tar il cuntegn

Header

cuntegn

Exteriur Prinzi ereditar saudiarab vul monarchia pli liberala

Il prinzi ereditar da l'Arabia saudita, Mohammed bin Salam vul liberalisar la monarchia conservativa.

El veglia turnar tar l'islam moderà che saja avert envers il mund. Ideas extremisticas vegnia el a destruir, ha ditg il prinzi ereditar saudiarab Mohammed bin Salam ad ina conferenza a Riad. Tar ses pled davart ses plans per l'avegnir da l'Arabia Saudita ha il prinzi ereditor survegnì bler applaus.

Nus turnain là, nua che nus eran ina giada: l'Islam moderà, ch'è avert vers il mund e tut las religiuns.
Autur: Mohammed bin Salman prenzi ereditar Arabia Saudita

Il prenzi che liberalisescha

Avant il 1979 saja l'Arabia Saudita stada autra. Pia avant che islamists radicals avevan occupà la moschea gronda a Mekka, ed han pretendì la demissiun dal retg Chalid e d'installar ina regenza veritabla muslima. L'armada aveva bain liberà la moschea – la liberalisaziun era però franada.

Ozendi sajan 70% da la populaziun pli giuvna che 30 onns. Ni el sez ch'ha 32 onns, ni la populaziun veglia sfarlattar ulteriurs 30 onns per s'occupar dad ideas extremisticas. La populaziun veglia ina vita normala.

Il prinzi cun visiuns

Curt avant aveva bin Salam preschentà ses plans per ina nova citad giganta. Per 500 milliardas dollars duai la citad avair ina surfatscha mez uschè gronda sco la Svizra. Era per la pli gronda midada economica planisada. Cun in project da billiuns vul el reducir la dependenza economica da l'ieli.

Il prinzi però era dispitaivel

Autras iniziativas dal prinzi ereditar èn però era vegnidas crititgadas sin plaun internaziunal. Tranter auter per la posiziun agressiva cun la campagna militara en il Jemen, che vegn manada da l'Arabia Saudita. Tar attatgas aviaticas militaras èn morts millis da civilists.

RR novitads 08:00

Artitgels legids il pli savens