Siglir tar il cuntegn
cuntegn

Exteriur Process cunter separatists catalans ha cumenzà

12 manaders dals separatists catalans èn davant dretgira. 16 fin 25 onns praschun pretendan las autoritads per ils delinquents supponids.

Purtret da protestants che tegnan enta maun bandieras e placats.
Legenda: Davant il tribunal suprem a Madrid vegn protestà da laschar liber ils separatists. Keystone

Il tribunal suprem a Madrid ha cumenzà oz cun il process da 12 separatists catalans. L'anteriur primminister da la Catalugna, Carles Puigdemont ha numnà il cas ina «vargugna». La procura publica spagnola renfatscha als politichers ed activists rebelliun, revolta e defraudaziun da daners publics. Ils separatists èn dapi prest in onn en praschun, quai pervi da las renfatschas en connex cun il referendum d'independenza dal prim d'october 2017.

Per l'anteriur vicepresident da la regiun, Oriol Junqueras pretenda la procura publica 25 onns praschun, per blers dals auters 16 fin 17 onns praschun. En tut duain prest 600 perditgas vegnir interrogads. Tranter auter er il primminister spagnol, Mariano Rajoy. Durant ses temp d'uffizi èsi vegnì tar il referendum. Il proceder duai cuzzar almain trais mais.

Puigdemont è persvadì ch'i vegn a dar l'independenza

L'anteriur president da la regiun, Carles Puigdemont n'è betg pertutgà dal cas. El è il mument en Belgia en l'exil e la Spagna na maina betg tras proceduras giuridicas sch'ils accusads n'èn betg preschents. El ha crititgà a moda ferma il cas, quai saja ina vargugna. I na saja betg acceptabel che la dretgira vesia l'organisaziun d'in referendum sco crim. Il dretg internaziunal dettia al pievel il dretg da decider sez. La Spagna n'haja betg realisà quest dretg. Ils accusaders a Madrid sa refereschian sin la protecziun da la Constituziun.

Nus essan en ina fasa transitorica, nus vegnin a cumbatter enavant ed acceptar la decisiun a l'urna. Il problem Catalugna datti dapi 300 onns. Igl è uras per ina schliaziun.
Autur: Carles PuigdemontAnteriur president da la Catalugna

Ils aderents da la separaziun da la Catalugna han gia annunzià da vulair demonstrar danovamain en la regiun da conflict. Els han clamà si a novas acziuns da protesta. Manifestaziuns èn planisadas a Barcelona ed autras citads catalanas, ma er a Brüssel ed en citads tudestgas sco Berlin, Hamburg e Cologna.

RR novitads 11:00