Siglir tar il cuntegn

Header

Fabrica da termagls China (maletg simbolic)
Legenda: Pajas bassas e lungs dis da lavur èn realitad per blers lavurers en fabricas da termagls chinaisas. (maletg simbolic) Keystone
cuntegn

Producziun en China Blers termagls producids sut circumstanzas malgistas

Termagls sco legos u barbies stattan sin bain inqual glista da giavisch sch'i va per ils regalins da Nadal. Quels ed anc blers auters termagls e gieus derivan savens da la China, producids sut circumstanzas malgistas. Questa conclusiun fa il rapport «Toys Report 2019».

Era l'organisaziun Solidar Suisse enconuscha la situaziun da lavur sin il martgà da termagls chinais. En bleras fabricas da gronds producents da termagls sco Disney, Hasbro u Mattel sajan dis da lavur da passa 10 uras e pajas bassas il paun da mintgadi per lavureras e lavurers. Quai ha declerà Simone Wasmann da Solidar Suisse al radio SRF. L'organisaziun cumbatta per cundiziuns da lavur fairas en l'Asia. Sco Wasmann di saja quai grev da chattar termagls fairs che vegnan producids en China.

Cumbatter per dapli paja e pli paucas uras da lavur

Dapi tschintg onns s'engascha Solidar Suisse per meglras cundiziuns da lavur en fabricas da termagls chinaisas. Pitschens pass hajan els gia pudì far. Uschia saja il temp da lavur sa reducì in zic - avant onns erian dis da lavur da 14 uras realitad. Uss sajan quels circa tar 11 uras.

Er puncto pajas dettia basegn d'agir. Uschia saja la finamira da Solidar Suisse e lur partenaris en China d'auzar las pajas – uschia che lavurers pon pajar ina chombra u abitaziun e na ston betg durmir en dormitoris en la fabrica.

Er consument sa meglierar la situaziun

Solidar Suisse sa drizza era al consument. Simone Wasmann cusseglia per l'ina d'esser attent danunder ch'il product vegn, lura da dumandar critic en butia davart las circumstanzas da lavur u simplamain da chattar alternativas. Talas pudessan esser cumprar termagls ord segund maun, u simplamain regalar in'excursiun.

RR actualitad 11:00