Quai annunzian emetturs da televisiun. Blers Grecs teman ch'ina extrada da la Grezia da la gruppa da l'euro saja nunevitabla, tuttina tge resultat ch'ina votaziun purtass. Perquai van els per uschè blers daners sco pussaivel.
Questa damaun aveva Alexis Tsipras, il schef da la regenza grecca annunzià surprendentamain da vulair laschar votar il pievel davart il program da spargn proponì dals crediturs internaziunals.
Tsipras ha rinfatschà als crediturs internaziunals che tschertas instituziuns e partenaris hajan l'intenziun d'offender in entir pievel. Il parlament grec veglia seser ensemen anc oz per approvar questa votaziun previsa per ils 5 da fanadur. El supplitgeschia perquai ils crediturs da prolungar il pachet d'agid per in pèr dis.
RR novitads 12:00