Amez in svilup cun pli e pli tensiuns tranter la Georgia e la Russia van millis da persunas sin via en la chapitala da Tiflis. Ellas protesteschian gia il quart di en fila, sajan sa radunadas davant il parlament ed hajan bloccà uschia il traffic, scriva la SDA.
Influenza pli e pli gronda dad oligarc
La glieud protestescha cunter la Russia e cunter la partida da regenza georgiana «Siemi georgian», ch'è vegnida fundada da l'oligarc Iwanischwili. Sin placats vegn reclamà da l'influenza che Iwanschwili haja sin la politica dal pajais.
Demonstrants pretendan elecziuns novas
Ils protests duajan cuntinuar fin che las pretaisas dals demonstrants sajan ademplidas, scriva la SDA. Uschia vegn pretendì ch'i dettia elecziuns novas e ch'il minister da l'intern sa retiria. Quel duai surpigliar la responsabladad per l'acziun da polizia cunter demonstrants la gievgia passada. Lura avevi dà pli che 200 persunas blessadas e radund 300 arrestaziuns.
Discurs provocant en il parlament georgian
Ils protests avevan cumenzà pervi da la cumparsa d'in politicher russ en il parlament da la Georgia. Tar sia visita era il Russ sa drizzà da la plazza dal president dal parlament als parlamentaris.
Avant 11 onns avevan la Georgia e la Russia fatg guerra per las regiuns da l’Abchasia e l’Ossezia dal Sid.
RR novitads 06:00
