Siglir tar il cuntegn

Header

cuntegn

Protestas in Egipta Millis dad egipzians èn ids sin via

En l’entira Egipta èn millis da persunas idas sin via per demonstrar cunter il president e general Abdel Fattah al-Sisi. Quai rapporta l'agentura da novitads SDA sin basa dad infurmaziuns da l'Agentura AFP.

General al-Sisi na tolerescha nagina critica

Sulettamain en la chapitala Cairo sajan sa radunadas tschientinas da persunas, scrivan las agenturas vinavant. Ils demonstrants sajan stads sin l'enconuschenta plazza Tahrir.

Quella plazza era il center da las protestas da massa, che avevan manà avant 8 onns a la fin da l'era Mubarak en Egipta. Dapi ch'il general Abdel Fattah al-Sisi haja stgatschà il 2013 il president elegì Mursi na vegnia pli tolerada critica vi da la regenza.

Arrestaziuns ed admoniziuns

La polizia haja schlià svelt ils protests da la notg passada ed arrestà almain 74 persunas, rapporta AFP. Gia avant in'emna aveva al-Sisi admonì ad in congress da giuventetgna che critica vi da la regenza possia esser privlusa.

Appellà als protests aveva in impressari egipzian che viva a l’exil en Spagna. El renfatscha al president al-Sisi ed a plirs generals ch'els sajan corrupts.

audio
Per tadlar: Las novitads da las 12:00
ord Actualitad dals 21.09.2019.
laschar ir. Durada: 4 minutas 36 Secundas.

RR novitads 12:00+

Artitgels legids il pli savens