Siglir tar il cuntegn

Header

camiuns che bloccheschan vias
Legenda: Camiunistas e camiumists bloccheschan vias per protestar cunter las restricziuns da las mesiras cunter il coronavirus (qua ad Ottawa, Ontario). Keystone
cuntegn

Protestas Regenza canadaisa declera stadi d'urgenza

Il primminister canadais Justin Trudeau ha proclamà il stadi d'urgenza. El reagescha cun quai sin ils protests da camiunists e camiunistas cunter las mesiras da corona. Las bloccadas da vias sajan illegalas, ha ditg Trudeau. La regenza stoppia reagir decididamain. Las bloccadas donnegeschian l'economia e pericliteschan la segirtad publica, argumentescha Trudeau.

Bloccar la finanziaziun da la bloccada

Il plan è dad impedir la finanziaziun da las protestas. Tut las plattafurmas da crowdfunding ston s'annunziar tar l'autoritad canadaisa cunter lavar daners ed annunziar transacziuns suspectusas. Questas plattafurmas vegnian nizzegiadas per finanziar las bloccadas. Betg sclaus èsi era che contos da persunas vegnan schelads e bloccads – contos da persunas che sustegnian las protestas da l'uschenumnà «Freedom Convoy». Ultra da quai saja previs da sistir las assicuranzas dals camiuns che fan part a la bloccada.

Il parlament ha anc d'approvar quest pass

Cun quest pass po la regenza metter ord vigur era dretgs da burgais durant in temp. Las mesiras duain era esser temporaras e mo localas. Questa mesira prenda la regenza canadaisa suenter radund trais emnas da protestas, nua che las autoritads regiunalas dad Ottawa ed Ontario n'hajan betg dumagnà da metter ina fin. Per l'applicaziun dal dretg d'urgenza dovra Trudeau però anc l'apporvaziun dal parlament, nua che sia partida liberala n'ha nagina maioritad.

RTR novitads 09:00

Artitgels legids il pli savens

Scrollar a sanestra Scrollar a dretga