Siglir tar il cuntegn

Header

cuntegn

Protests a Hongkong Nagin paus a Hongkong – ils protests bloccheschan l'eroport

Perquai che la polizia saja adina pli brutala cunter ils demonstrants hajan quels bloccà l’eroport internaziunal da la metropola Hongkong. Quai rapportan differentas agenturas da novitads.

Millis da demonstrants hajan bloccà las hallas da partenza ed arrivada. L’aeroport ha communitgà dad interrumper perquai il check-in per ils ulteriurs sgols dal glindesdi.

Demonstrants: «Dar enavos ad ella ses egl»

Divers demonstrants en nair portian faschas d’egl cotschnas, rapportan las agenturas. La fin d’emna era vegnida blessada in’activista grevamain en fatscha. Ils demonstrants a l’eroport pretendevan da «dar enavos ad ella ses egl».

Ils demonstrants avevan construì la fin d’emna barricadas ed attatgà la polizia. Las forzas da segirezza han reagì cun gas lacrimogen e projectils da gumma.

China: «Emprims indizis da terrorissem»

Er la regenza chinaisa è s’annunziada a pled. Dad ella vegn retorica pli e pli marziala. Ella ha condemnà danovamain ils protests a Hongkong – quels mussian «emprims indizis da terrorissem» ha ditg in pledader da la regenza.

Dapi radund diesch emnas demonstreschan millis persunas a Hongkong cunter la regenza, l’influenza da la China e l’agir da la polizia.

RR novitads 16:00++

Artitgels legids il pli savens