Suenter la mort dad in Afroamerican tar in'acziun da polizia brutala a Minneapolis hai er la 5avla notg en seria dà protests e cravals en passa 30 citads americanas. Ils demonstrants pretendan che tut ils policists ch’eran involvids en l’acziun da glindesdi a Minneapolis vegnian accusads.
A Minneapolis en il stadi da Minesota han ils demonstrants danovamamin betg resguardà il scumond da sortida. L'emettur CNN rapporta che forzas da segirezza hajan tegnì enavos ils demonstrants cun gas lacrimogen. En numerusas ulteriuras citads sco Los Angeles, New York, Portland ed Atlanta hai dà tumults e sblundregiadas, sco CNN rapporta.
Tut en tut han 25 citads en 16 stadis decretà in scumond da sortida. Tenor cifras da l’agentura da novitads AP èn 1’400 persunas vegnidas arrestadas en 17 citads.
Appel da Joe Biden
Il candidat democrat per il presidi american Joe Biden ha appellà als demonstrants da desister da violenza. Da demonstrar cunter la violenza da la polizia saja in dretg e necessari, ha ditg Biden. Ma da metter fieu en citads e destruir edifizis ed uschia metter en privel persunas na saja nagin dretg.