Siglir tar il cuntegn

Header

cuntegn

Exteriur Protests pervia da refurma da giustia planisada en Pologna

En Pologna ha la refurma da la giustia planisada chaschunà protests. Plirs millis persunas hajan protestà sin las vias. Tenor ils organisaturs hai dà venderdi saira protests en radund 100 citads.

Cun il motto «libra dretgiras, libras elecziuns, libra Pologna» sajan sa radunads be a Warschau plirs millis persunas avant il palaz dal president. Ils demonstrants hajan fatg sgulatschar bandieras da la Pologna ed hajan tegnì copias da la constituziun en l'aria, han rapportà las agenturas da novitads.

Puspè debattas davart refurma da la lescha da giustia planisada

Quest emna ha il parlament puspè debattà davart la refurma planisada. Las midadas pertutgassan la lescha dal tribunal suprem ed il cussegl da derschaders.

Ils plans per ina refurma da la giustia da la regenza han chaschunà gia la stad passada protests en tut il pajais. Era la cumissiun da l'UE haveva crititgà ils plans da la Pologna.

President fa diever da ses veto

Sin quai ha il president Andrzej Duda fatg diever da ses veto ed annunzià atgnas propostas. Davart questas propostas discuta il parlament dapi quest'emna. Represchentants da l'opposiziun n'èn dentant betg cuntents cun las propostas dal president. Era quellas na sajan betg tenor la constituziun.

RR novitads 08:00

Artitgels legids il pli savens