Siglir tar il cuntegn

Header

video
Ord 10vor10: Morts e blessads en l'Israel
Or da 10 vor 10 dals 10.05.2021.
laschar ir. Durada: 57 Secundas.
cuntegn

Proxim Orient Plirs morts en la Strivla da Gaza

Il conflict tranter l'Israel e Palestina è escalà il glindesdi. Tant ils Iraelians sco er ils Palestinais han attatgà in a l'auter cun rachetas.

  • La situaziun en il Proxim Orient è escalada il glindesdi
  • Tar in'attatga da l'armada israeliana èn 20 Palestinais vegnids mazzads – tranter quels 9 uffants.
  • L'Israel reagescha cun questa attatga sin rachetas sajettadas or da la Strivla da Gaza – ina persuna è vegnida blessada en l'Israel
  • In dals motivs per las novas confruntaziuns èn ils plans israelians da stgatschar Palestinais ord lur chasas a Jerusalem per far plaz a colonists gidieus.

Quai rapporta il ministeri da sanadad en il Gaza. Avant avevan Palestinais sajettà pliras rachetas envers l'Israel. Quai sco reacziun sin ils eveniments al Munt dal Tempel.

Suenter confruntaziuns violentas tranter Palestinais e la polizia israeliana en l'Ost da Jerusalem aveva la Hamas mess in'ultimatum a l'Israel – u ch'il pajais vegnia a retrair tut ils policists e colonists dal Munt dal Tempel / Al-Haram al-Scharif, sco er or dal quartier Scheich Dascharrah – ni ch'i dettia consequenzas. Suenter che l'Israel ha ignorà las pretensiuns da la Hamas ha quella sajettà pliras rachetas envers l'Israel. Tenor il militar israelian è almain ina persuna vegnida blessada.

Conflict al Munt dal Tempel smanatscha gia in temp d'escalar

Il Munt dal Tempel vala tant per ils Israelians sco er per ils Palestinais sco in lieu d'impurtanza religiusa. Igl è il terz impurtant lieu en l'Islam. Plinavant devi pli baud dus tempels giudaics en il territori, l'ultim è vegnì destruì l'onn 70 entras ils Romans. Il Mir da las lamentaziuns (Klagemauer) è ina restanza da quest tempel.

Il status da Jerusalem è dapi onns in dals puncts centrals en il conflict dal Proxim Orient. Israel vesa Jerusalem sco chapitala, ils Palestinais da lur vart vesan l'Ost da Jerusalem sco lur chapitala.

Polizia Israeliana
Legenda: La charplina tranter la polizia israeliana e Palestinais al Munt dal Tempel. Keystone

La situaziun en l'Ost da Jerusalem è gia dapi l'entschatta dal Ramadan fitg tendida. Blers Palestinais èn ravgentads, perquai che la polizia da l'Israel ha bloccà la citad veglia. Plinavant vulan autoritads israelianas stgatschar palestinais ord lur chasas en il quartier Scheich Dscharrah a Jerusalem per far plaz a colonists gidieus.

L'Ost da Jerusalem

Avrir la box Serrar la box

Il status da Jerusalem è in dals puncts centrals dal conflict dal Proxim Orient. Il 1967 ha l'Israel conquistà durant la guerra da sis dis la part da l'ost da la citad. Il 1980 ha l'Israel alura annectà uffizialmain il territori a Cisjordania. Il territori vala sco territori occupà. La communitad internaziunala na renconuscha betg l'Ost da Jerusalem sco territori israelian.

RTR Novitads 21:00

Artitgels legids il pli savens