Siglir tar il cuntegn

Header

cuntegn

Puerto Rico Bainbaud in nov guvernatur

Entamez ina crisa politica ha il guvernatur dal Puerto Rico, Ricardo Rosselló, remess ses uffizi ed annunzià il sarament da ses successur Pedro Pierluisi. Uschia duai il vacuum politic ir a fin. L'elecziun ha dentant lantschà ina cuntraversa.

En ina decleraziun dal biro dal guvernatur hai gì num, ch’il giurist Pedro Pierluisi saja vegnì saramentà. Venderdi aveva la chombra dals deputads confermà el sco vice-guvernatur. Ina votaziun na saja tenor Rosselló betg necessaria.

Auter vesa quai il president dal senat: Enfin ch’i dettia ina votaziun en il senat davart la successiun, saja tenor dretg vertent la ministra da giustia, Wanda Vazquez, en uffizi – e betg Pierluisi. Vazquez sezza è dentant er sut squitsch pervi da renfatschas da corrupziun. Ella ha perquai declerà da betg esser interessada vi dal post da guvernatura.

Rosselló era sa retratg pervi da protests da massa. Quai sco consequenza da chats online dispitaivels ch’eran vegnids enconuschents.

RR novitads 06:00