Siglir tar il cuntegn
Inhalt

Exteriur Puspè pesticids vi da maila biologica en il Tirol dal Sid

Sco ch’il pur biologic Ägidius Wellenzohn ha confermà ad RTR, hajan ins chattà er quest onn pesticids sin la feglia da ses pumers. El spera ussa ch’il tissi sa dissolvia fin tar la racolta da la maila.

Maun che prenda mail.
Legenda: La maila dad Ägidius Wellenzohn na dastga avair naginas restanzas da tissi tar la racolta. Keystone

Las analisas da rutina sajan vegnidas fatgas gia il zercladur da quest onn. Il resultat dals tests è cler. La feglia haja restanzas da Captan, in ferm tissi da plantas. E quai cun ina valur da 1,4 mg/kilo sin ina surfatscha da 15 meters, uschia il pur biologic che ha sias plantaschas en il Tirol dal Sid.

Plirs tissis

Ultra da quai hajan ins era savì mussar si restanzas da Dodine, Dithianon e Fluazinam, tut sorts da pesticids che vegnan duvradas er en l’agricultura. Ägidius Wellenzohn è in dals iniziants da la gruppa «Adam & Epfl» che s’engascha per in’agricultura senza pesticids.

Avertir la populaziun

Ch’ins ha puspè chattà fastizs da pesticids sin ses pumers, declera Wellenzohn cun acziuns da purs sin plantaschas dasper sias. Sche quels squittian ils pesticids durant ch’il vent boffa, riva ina part automaticamain er sin sia maila. Sco il pur biologic ha ditg ad RTR vul el dentant er render attent tut la glieud che viva en vischinanza dals pumers, che quella è er exposta als tissis ed ils respira er.

Wellenzohn ha sustegnì cun engaschament ils iniziants da Mals che han inoltrà l'onn 2014 ina iniziativa. Quella scumonda il diever da pestizids sin il territori da la vischnanca da Mals. La populaziun aveva ditg gea cun passa 75% a l'iniziativa. Quella n'è dentant anc adina betg realisada pervia da discussiuns giuridicas.

L’onn passà avevan nunenconuschents attatgà cun pesticids la plantascha dal pur ed uschia ruinà la racolta e destruì per part la lavur da 30 onns. Sche la racolta da mails da quest onn è er contaminada u sch’ils fritgs èn anc buns dad elavurar il tissi, n’è anc betg cler. En tut racoglia Ägidius Wellenzohn radund 20-30’000 kilos maila.

RR actualitad 17:00