Pliras societads aviaticas han stritgà tschients sgols en la Gronda Britannia da questa fin d'emna. Quai pervi dal stemprà «Dennis» che vegn cun ferms vents. Pertutgads èn radund 10'000 passaschiers - tranter autras era da las societads aviaticas Easyjet e British Airways.
Pervi da fermas plievgias quintan meteorologs puspè cun inundaziuns. Potenzialmain sajan pertutgadas tschients chasas - ed ultra da quai quintani era cun disturbis sin vias e binaris ed en il provediment cun electricitad.
Consequenzas pli gravantas che «Ciara»
Avant in'emna aveva il stemprà «Ciara» gia procurà per situaziuns caoticas e plievgias. Il stemprà «Dennis» saja però pli ferm che la «Ciara» da l'emna passada. E cunquai che la terra saja anc adina loma e bletscha, quintan ils meteorologs cun consequenzas pli gravantas.
Actualmain èn pertutgadas surtut l'Engalterra dal sidvest e Wales.
RTR novitads 16:00