Siglir tar il cuntegn

Header

cuntegn

Putsch militar en il Niger Niger na collavura betg pli cun la Frantscha

La regenza da Niger ha terminà la collavuraziun militara cun la Frantscha. Quai ha ditg in pledader da la regenza militara a la televisiun statala. Il mument èn passa 1'000 schuldads da la Frantscha staziunads en il Niger. Els cumbattan tranter auter organisaziuns islamisticas. Tge che l'annunzia munta per els n'è anc betg cler. Il Niger valeva sco davos partenari da la Frantscha en la regiun. Or dals pajais vischinants Mali e Burkina Fasa aveva la Frantscha gia stuì retrair la schuldada, era quai mintgamai suenter in putsch.

Evacuaziun da 10 Svizzers

A bord d’in aviun franzos han 10 persunas cun pass svizzer bandunà il pajais african. Quai ha ditg il Departament federal dals affars exteriurs EDA sin dumonda da l’agentura da novitads Keystone-SDA. Radund dus tozzels Svizzers e Svizras èn anc restadas en il pajais malruassaivel. Il departament federal resta en contact cun questa glieud. Gia dapi il 2009 scusseglia l’EDA da far viadis en il Niger, ed insumma da sa render en il pajais.

Divers pajais han fin uss laschà sgular enavos lur burgaisas e burgais dal Niger. La Frantscha ha terminà l'evacuaziun da lur burgais e burgaisas, communitgescha il ministeri dals affars externs franzos. En tut han tschintg aviuns franzos manà passà 1'000 persunas or dal Niger.

Auters pajais cuntinueschan entant cun lur acziuns d'evacuar. Suenter ils Stadis Unids ha uss era la Gronda Britannia annunzià, da retrair ina part da ses persunal da l'ambassada en il Niger.

Putsch militar en il Niger

Avrir la box Serrar la box

L'emna passada han uffiziers dal general Omar Tchianis privà da la pussanza il president elegì democraticamain Mohamed Bazoum.

Tchiani è alura sa declerà il venderdi sco potentat. Curt suenter quai han ils putschists mess ord vigur la constituziun dal pajais da l'Africa dal Vest.

En il fratemp ha il pajais avrì puspè ses cunfins cun la gronda part dals stadis vischins. I giaja per ils cunfins cun il Mali, la Burkina Faso, l’Algeria, la Libia e il Tschad, ha communitgà in pledader da la regenza militara.

Rolla da la Frantscha

La Frantscha, l'anteriura pussanza coloniala, ha staziunà en il Niger ed il Tschad 2'500 schuldada. Il Niger è enfin qua stà partenari local da la Frantscha quai che pertutga il cumbat da terror en la zona da Sahel. Il pajais è er pervia da ses deposits d'uran d'interess per la Frantscha.

Or da l'archiv

video
Niger: Frantscha cumenza cun evacuaziun
Or da Tagesschau dals 01.08.2023.
laschar ir. Durada: 2 minutas 53 Secundas.

RTR novitads 09:00

Artitgels legids il pli savens

Scrollar a sanestra Scrollar a dretga