Il politicher separatist Quim Torra è vegnì elegì il glindesdi dal parlament a Barcelona sco nov president regiunal da la Catalugna. Er Torra è cun persvasiun separatist – ina confruntaziun cun Madrid ès uschia programmà ordavant. Il politicher da 55 onns ha cuntanschì en il segund scrutini la maioritad simpla.
Tar l'emprim scrutini da la sonda aveva Torra anc munchentà la maioritad absoluta. Il nov president è vegnì elegì cun 66 vuschs Gea cunter 65 vuschs Na. 4 politichers la la partida sanestra radicala CUP èn s'abstegnids da la vusch. Els vulevan vinavant Carles Puigdemont sco president regiunal, han uss dentant tolerà l'elecziun da Quim Torra. L'ultima gievgia aveva Puigdemont desistì d'ina atgna candidatura.
Uschia terminescha ina bloccada politica che cuzza gia dapi mais. En diesch dis fiss scrodà il termin per furmar ina nova regenza. Cun eleger Torra ha il parlament catalan uschia pudì evitar novas elecziuns.
RR novitads 17:00