Independent dal resultat en la Gronda Britannia: L'Uniun europeica dovria refurmas sch'ella veglia exister vinavant. Ed ord quest punct da vista saja quai bun ch'i dettia la votaziun Brexit e cunquai er ina discussiun davart l'avegnir da l'UE. Quai di Stefanie Walter da l'Institut per scienza da politica a l'Universitad da Turitg.
L'Uniun europeica stoppia sa dumandar, en tge secturs ch'i fetschia senn d'avair schliaziuns centralas e nua ch'ils stadis commembers sajan autonoms en lur decisiuns.
Era auters stadis commembers pudessan far valair dapli libertads da Brüssel.
Andreas Glaser, directur dal Center per democrazia ad Aarau, avertescha che la votaziun dals 23 da zercladur en la Gronda Britannia pudess avair effect era sin ils auters 28 stadis commembers: In u l'auter pudess medemamain pretender dapli autonomia da Brüssel. Perquai èn omadus experts per dumondas internaziunalas da l'avis: In'integraziun anc pli gronda, pia dapli pussonza centrala a Brüssel, na saja betg giavischà tar ina maioritad da la populaziun en l'Europa.
Dat l'Uniun Europeica dapart pervi da Brexit?
Suenter la crisa da daivets, la crisa da l'euro e la crisa da fugitivs è la votaziun Brexit en Gronda Britannia be in da plirs puncts da discussiun aifer l'Uniun europeica.
L'UE è en la pli greva fasa dapi sia fundaziun.
Mo era sche las dispitas vegnian discutadas avertamain na dettia l'Uniun europeica betg dapart pervia da quai, di la politologa Stefanie Walter. Ella vesa duas raschuns per la crisa: Per l'ina fetschia l'entira globalisaziun e la digitalisaziun tema a la populaziun, aschia che blers giavischan anavos il temp avant l'UE e sustegnan uschia era las posiziuns da partidas populisticas. Per l'autra saja l'Uniun europeica carschida fitg spert e saja sa midada - surtut cun ils pajais da l'ost.
Brexit e las consequenzas per l'UE
Che gist la Gronda Britannia votescha davart restar u sortir da l'Uniun europeica fa surstar be per part Stefanie Walter: Bain saja la Gronda Britannia gia adina stada scheptica envers l'UE - il pajais haja dentant era gia cuntanschì bleras cundiziuns spezialas da Brüssel. Ma era cun quellas n'haja il primminister David Cameron betg pudì persvader ils critichers - surtut quels da la partida UKIP.
Las consequenzas da Brexit n'èn betg mo nair-alv.
Las consequenzas exactas che la votaziun Brexit ha sin l'Uniun Europeica èn difficilas da prevesair. Il spezialist per dumondas da democrazia, Andreas Glaser, fa attent ch'i na dettia betg mo las opziuns da restar u sortir per la Gronda Britannia. Gist sco la Svizra dettia quai er pussaivladads da contractar, quant fitg ch'il pajais veglia esser integrà en l'UE.
RR actualitad 12:00