Siglir tar il cuntegn
Inhalt

Exteriur Raiffeisen: president defenda la direcziun

En l’affera enturn l’anteriur schef da la Raiffeisen, Pierin Vincenz, defenda il president da la banca, Johannes Rüegg-Stürm, la direcziun.

Logo Raiffeisen.
Legenda: La direcziun n'haja betg pudì enconuscher pussaivlas acziuns illegalas. Keystone

Per la direcziun fissian las activitads illegalas che vegnan renfatschadas a l'anteriur schef da la Raiffeisen Pierin Vincenz betg stadas d'enconuscher. Cun questa argumentaziun defenda il president da la banca, Johannes Rüegg-Stürm, la direcziun.

Maletg sbaglià

Sche la direcziun survegnia indicaziuns falladas u sch'ella vegnia betg infurmada davart chausas impurtantas, na sappia la direcziun betg far in maletg correct da la situaziun, ha Rüegg-Stürm declerà a la gasetta «NZZ am Sonntag». Vincenz haja zuppentà fatgs impurtants envers la direcziun.

La banca haja però reagì «fitg spert» ed haja lantschà in'examinaziun interna, cura ch'i haja dà il suspect ch'ensatge na saja betg correct.

Tuttina er fatg sbagls

Dentant conceda el er sbagls: I na saja betg stà ina bun'idea d'engaschar la dunna da Vincenz sco manadra da la partiziun da dretg. Quai haja manà ad ina «constellaziun disfavuraivla». Cun la savida actuala na decidess el auter, manegia il president.

RR novitads 09:00