Tut ils cumbattants sirians da la milissa terroristica Stadi Islamic hajan rumì la citad, ha communitgà il post d’observaziun sirian per ils dretgs umans ch'è situada en Gronda Britannia. Pliras dunsainas da cumbattants hajan capitulà. Intgins cumbattants esters dal SI sajan però anc adina a Rakka, rapportan agenturas da novitad. Il post d'observaziun retira sias infurmaziuns d'ina rait d'activists al lieu.
La coaliziun manada dals Stadis Unids cunter l'SI ha rapportà che radund 100 cumbattants da l'SI hajan capitulà entaifer da 24 uras. Tenor rebels curds pudessan ils ultims cumbats dentant anc cuzzar uras u dis.
Cumbattants da l'exteriur restan
Commembers da l'exteriur da l'SI restaian anc adina en la citad, quai tenor activists per dretgs umans. L'emprim na saja anc betg stà cler da quantas persunas ch'i sa tracta. Las tractativas davart la retratga dals tals cumbattants sajan vegnidas franadas perquai ch'il tirafils dals attentas a Paris il 2015 saja sco para tranter els.
A Paris eran mortas il 2015 passa 130 persunas. En la halla da concerts "Bataclan" avevan terrorists chaschunà in massacher. Davant il Stade de France eran taris attentaders da suizid sa saglientads cun bumbas durant in gieu da la Frantscha cunter la Germania.
RR novitads 15:00