Nagin pajais fetschia avunda per cuntanscher las finamiras da la cunvegna da clima da Paris. Cunzunt tar l'adiever d'energia dettia i anc potenzial. Quai èn ils resultats da la rangaziun da clima annuala da Germanwatch e dal institut NewClimate. Els han examinà ils 56 pajais e l'Uniun europeica ch'èn ensemen responsabels per 90% da gas cun effect da serra.
Resultats uschè nauschs, ch'ils emprims trais plazs restan vids
Per quai che nagins dals pajais examinads mussan resultats persvadents èn ils emprims terzs plazs vids e la Svezia suonda cun il meglier resultat sin il quart post. Il pajais scandinav è sa sviluppà bain en ils secturs d'energias regenerablas e la reducziun da gas cun effect da serra. Enfin il 2045 vul la Svezia esser CO2-neutrala – vul dir cumpensar tut quai ch'ella emetta.
Ils davos plazs occupan ils Stadis Unids, l'Australia e l'Arabia Saudita. In dals auturs dal studi commentescha ch'ils Stadis Unids ed la Arabia Saudita hajan d'augmentar las finamiras da reducziun drasticamain.
Plaz 12 per la Svizra
La Svizra mussa cun il 12avel plaz resultats sumegliants a quels dals davos onns. Dentant ha la Svizra betg d'engraziar quest plaz a sias bunas prestaziuns, mabain a quai ch'ils auters pajais hajan anc mender resultats, commentescha Patrick Hofstetter dal WWF Svizra. Zunt en connex cun las finamiras da clima 2030 haja la Svizra resultats cleramain insuffizients.
La Svizra ha da redublar sias stentas
Per cuntanscher las finamiras da clima da la cunvegna da Paris ha la Svizra d'augmentar las finamiras da reducziun per al main il dubel. Er en il champ da l'energia regenerabla n'è la Svizra nagin pajais exemplaric. Quatter tschintgavels da l'energia Svizra saja anc adina energia importada, che n'è betg regenerabla, crititgescha il WWF Svizra.
RR novitads 15:00