Il pli impurtant en curt:
- Curt avant las 14:00 era terminà il rapinament, ha communitgà la regenza da la Cipra via Twitter.
- Tut ils ostagis - crew e 55 passsagiers - han pudì bandunar l'aviun sauns e salvs.
- Suenter è sortì il rapinader culs mauns en aul. L'um egipzian è vegnì arrestà. Elpurtava in'attrappa da bumba vid il corp e dumandava la libertad per intginas praschunieras egipzianas e per sa sez asil en Europa.
- Il sgol MS181 da l'Egyptair era vegnì rapinà sin ses viadi a Kairo ed era vegnì sfurzà da sa tschentar en la Cipra.
- L'acziun n'haja gì nagins motivs terroristics.
In Airbus da l’interpresa aviatica egipziana Egyptair è vegnì rapinà durant in sgol aifer l’Egipta e silsuenter atterrà en la citad Larnaca sin l’insla Cipra. L’emprim era quai nuncler sch’i sa tracta dad in u da plirs rapinaders.
Nagin motiv terroristic
Tenor indicaziuns dal president cipriot n’ha il rapinament nagin motiv terroristic. Quai ha ditg Nikos Anastasiades en la televisiun cipriota. L’agentura da novitads statala da l’Egipta rapporta ch’il rapinader duai esser in um egipzian.
Tenor la televisiun cipriota vuleva l’um discurrer cun si’anteriura dunna. Las autoritads da segirezza hajan tschertgà la dunna per purtar ella a l’eroport.
La maschina è sgulada d’Alexandria en l’Eqipta en la chapitala Kairo. Ils pilots hajan suenter la partenza prendì si contact cun la plazza aviatica da Larnaca e dumandà da pudair atterrar pervi d’in rapinament.
La plazza aviatica da Larnaca era vegnida fermada, tut ils sgols èn vegnids sviads.
RR novitads 09:00+