Las emissiuns da gas da serra dals 19 stadis industrials e da l'Uniun europeica s'augmentan vinavant. Uschia statti en il «Brown to Green Report» che la rait Climate Transparency ha publitgà trais emnas avant la conferenza dal clima da l'ONU a Madrid.
L'onn passà sajan las emissiuns en quests pajais s'augmentads per 1,8%. Ils stadis G20 èn responsabels per 80% da las emissiuns da gas da serra. Sin curs per la finamira da limitar il stgaudament da la terra sin 1,5 grads Celsius na saja betg in soli stadi da la gruppa.
Finamiras pli ambiziusas per il 2020
Ils scienziads e protegiders da l'ambient han dentant era novitads pli optimisticas. Radund la mesadad dals stadis dals G20, tranter quels er l'UE, surpassan lur atgnas finamias da clima. Uschia pudessan els preschentar finamiras pli ambiziusas il 2020, sco quai che la cunvegna dal clima da Paris prevesa.
Diever stuess sa sminuir drasticamain
Per vegnir da franar la midada dal clima tar in stgaudament dad 1,5 grads, stuess il diever da combustibels fossils sco ieli, charvun e gas natiral sa sminuir a moda drastica. Il mument retiran ils stadis da G20 82% da lur energia – betg be per l'electricitad mabain er per traffic e stgaudaments – da tals combustibels fossils. Ed il basegn per energia crescha anc adina.
RR novitads 06:00