Siglir tar il cuntegn

Header

cuntegn

Rapport da la WHO 25% dapli persunas han patì da malsognas psichicas

En consequenza da la pandemia da corona han marcantamain dapli persunas patì da malsognas psichicas. Quai ha communitgà l’Organisaziun mundiala da la sanadad WHO a chaschun da ses rapport davart la sanadad mentala.

L'emprim onn da la pandemia saja il dumber da cas da depressiuns e disturbis da la tema s'augmentà sin l'entir mund per 25%. Tenor il rapport da la WHO vivian bunamain ina milliarda carstgauns cun ina malsogna da la psica. Questa cifra sa refereschia anc sin l'onn 2019, pia anc avant corona.

L'Organisaziun mundiala da la sanadad appellescha a tut ils pajais d'investir dapli daners en la sanadad mentala. Umans cun grevs disturbis psichics morian en media 10 enfin 20 onns pli baud che la populaziun en general. La sanadad saja vegnida «emblidada» dapi decennis. Tut ils pajais dal mund stoppian far dapli per gidar ils pertutgads. Anc adina vegnian persunas cun malsognas psichicas discriminadas enstagl da vegnir integradas en tuts aspects da la vita sociala, per far frunt a las malsognas.

Il pli periclitads da talas malsognas sajan dapertut ils pli paupers. Il medem mument survegnian quels er il pli pauc agid. Schizunt en pajais sviluppads vegnia mo in terz da tut ils carstgauns depressivs tractads da persunal qualifitgà.

RTR novitads 06:00

Artitgels legids il pli savens

Scrollar a sanestra Scrollar a dretga